... git's d'Microsoft Bildschirmlupe. Sunscht chönnti de Teggscht uf dr Websiete gar nüm läse!

Dasch doch e Gränni. Herr Meier!

Du Zeeka, s'hets doch ebber gmerggt. Machsches wieder grösser? Gits kei Zwischestuefe?

Hend die Änderige (nit nur d'Schrift, au die andere) irgend e Sinn oder hesch eifach mol wieder welle d'Websiete bitz umgstalte?

Um im ehrlich z'si, find ich die Änderige momentan recht müehsam. Und Vorteil gsehn ich zur Zyyt au no keini.

Eifach mol so e ehrlich's Feedback.

Wasch denn nit guet? Was sott anders sy? Isch eifach e Veränderig/ Optimierig. Kritigg isch notierlig willkomme, mir gfallt au nit alles, aber dr Webmaschter isch eifach e stuure Grind.

De Forum Link rechts obe, und dass s'Forum nüm imne neue Fenster ufgoht. Find vor allem s'zweitere recht müehsam. Wenn meh am umesurfe uf de Siete isch, mol schnell will in's Forum luege und denn wieter will uf de Siete umeluege muesch nomol neu d'Siete öffne.

Aber wenn's eso "besser" isch, cha das de Webmaster so loh.

Das hani gar nonig gmerggt dass s'Forum nüm immene neye Fänschter uf goht. Dasch aber wirgligg e Scheiss!

@ Webmaschter: bitte ändere!

Forum im neye Fänschter: isch aabasst. Bym umgstalte vo de Menupunggt isch mer s "target='_blank'" verloore gange.

Die ney Aaornig: isch jetzt nit zuefällig, wies vorhär gsi isch. Mir händ jetzt obe duure die "interaktive" Sytene, bzw. dert wo mer äntwäder sälber ebbis ka schrybe (Forum/Guestbook) oder immer wider neyi Sache dri kemme (News, Kaländer, Feddeli). Und am lingge Rand denn die andere Syte, wo aifach numme statischi Infos enthalte.
D Aaornig innerhalb vo däne zwai Beryych ka me sicher no de Winsch aabasse, obwool myner Mainig no d Raiefolg nit schlächt isch: Z erscht die aigentlig wichtigschte Beryych, und denn no s Forum und GB.

Die Lyschte mit de neyschte Kaländeryydrääg nimm y wider vo dr Front-Syte drab und kopier se in Admin-Beraich. Die Funktion isch jo aigentlig numme fir mii intressant, dass y e biz dr Iberbligg gha bhalte. Fir dr Otto-Normal-Bsuecher isch das jo nit vo groossem Nutze.

D Eventlyschte (findet me bym Kaländer) isch e zuesätzlige Service. So gseet me grad uf ai Bligg, weli Aaläss in Zuekumft kemme, ooni dass me sich mues dur dr ganz Kaländer kligge. Steere duets jo nit, und wärs ka bruche, isch sicher froo driber.

D Schriftart isch mittlerwyyle wider ai Stufe uffegschrubt worde (vo 12 uff 10 aabe, und jetzt wider ufs 11 uffe). Y dängg, so kennen alli dermit lääbe. Myner Mainig no gseets aifach scheener uss, wenn d Schrift biz glainer isch. Zuedämm het au wider e biz me Teggscht uf ainere Syte platz. Und wenn me im Internet umeluegt, isch d Deppe-Syte jo nit die ainzig wo sone Schriftgreessi het.

Fir Aareegige stoossed iir by miir sicher uf en offes Oor (obs denn au umgsetzt wird, isch denn en anderi Froog ). Aber solang e gueti Begrindig ummen isch, derfte d Inputs au mii iberzyyge.