-----------------------------------------------------
Diskussion/Bestimmungen:
-zu eröffnende Threads/Abstimmungen: 1. Was gilt als Mehrheit? 2. Name des "Treffs"*
-Jede Woche 1 EINHEITLICHER Titel zum jeweiligen Threads des jeweiligen "Treffs"*
-Abmeldung bis jeweils Montag (bis j.** 23:59 Forumszeit) vor dem j.** "Treffen"*
-j.** Anmeldung jedoch erwünscht
-nicht rechtzeitige Abmeldung und unentschuldigte Absenzen werden gebüsst.***
-1 Souvenir muss j.** mit nach Hause genommen und fotografisch dargestellt werden.
----------------------------------------------------
*Name noch unklar
**j.=jeweils
***Form der Busse noch unklar
S'isch Mittwuch gsi, dr 2. Novämber. Wieder händ sich 4 Deppe troffe, um gmeinsam ebbis z'unternäh. Dr Quinto, Diibidääbi, Zeeka und dr Schaggi händ am 8i vor em "van der Merwe" abgmacht, um lässig e paar Bowlingkugele an d'Kegelpins (die mit Schnuer!) z'rolle. Derzue hets fiir jede no e fein Bierli gäh, fiir die einte e grössers, fiir die andere e kleiners.
Näbedra hets au no jüngeri Herrschafte gha, wo sich bim Bowling e scheene Oobe gmacht händ, speziell em Zeeka hets gfalle. Do är aber zweimol letschte worde isch, het är weder Iidruck bi de Dame kenne schinde, no e Trophäe irgendwelcher Art mit heim näh. Näggscht mol denn, Digge.
Jetzt wisse mer also, dass dr Zeeka abgstunke isch, aber är het jo no anderi Qualitäte! Dr Chef vom Oobe isch punktemässig definitiv dr Diibidääbi gsi, mit emene souveräne Sieg im erschte Durchgang und emene ganz knappe zweite Platz im zweite (3 Punggt Ruckstand uf dr Sieger), het är sini Form vo letschter Wuche unterstriche und zeigt, dass är parrat isch. Mer sind gspannt wo är sunscht no ka mit dr Elite mithalte.
Die gross Iiberaschig fiir einigi (är sälber hets natierlig erwartet), isch dr Schaggi gsi. Mit emene verknorzte 1. Lauf, anderi wurde sage, so spielt är halt, het är nit grad Hoffnige bi sine Fans gweckt und me het e liichti Ruckwärtsbewegig vo de Zueschauertribüne könne feschtstelle. Obwohl denn aber s'Handglängg und d'Finger gschmärzt händ (Röggli), het dr Schaggi d'Eier uf e Tisch gleggt und schnäll zeigt, das me mit ihm immer rächne muess. Dr Quinto hets schmärzlig miesse erfahre und als wenn das nit gnueg gsi wär, ischer no vom Diibidääbi um e Futzehöörlibreiti gschlaage worde. Dr 3. Rang isch definitiv Scheisse, aber so isch halt s'Lääbe. Wieter unde stoht no die komplett Ranglischte vo beidne Läuf, d'Pünggt miend er uf de Föteli go sueche. Ich hoff, me gseht se.
Nachdäm dr sportligg Teil abgschlosse gsi isch, het me sich denn no ebbis erfrischends gönnt und de Thuner in ihrem Champions League-Match gege Ajax Amsterdam zuegluegt. S'isch denn doch no Zyt worde fiir dr Heimwäg, doch bevor mer heim gstramplet sind, het dr Quinto unbedinggt no e weneli Luft in sim hintere Pneu brucht. Lieb wiener isch, het em dr Schaggi si Pumpi glehnt, jedoch het sich schnäll emol zeigt, das dr Quinto nie wirgligg mit emene Velo vertraut gmacht worde isch. Aber me muess em Kraft- und Konditionsufwand woner brocht het ganz klar Respäggt zolle! Dr Schaggi und dr Zeeka händ denn das Problem in ihri Händ gno und unter begeischterete Ovatione vom Diibidääbi händ sie gschafft, was niemer glaubt het: dr Pneu het wieder Luft gha! So hets doch no e Happy Änd gäh und es sind alli z'friede, aber sicher e bitzeli mied heim gange!
Dr 3. Deppe-Mittwuch isch ganz im Zeiche vo dr Basler Herbschmäss gstande. Allerdings isch s'Ziel nit gsi, soviel Gäld wie meeligg uf de Bahne z'verloche, sondern s'breite Spektrum vom kulinarische Aagebot z'gniesse.
D'Protagonischte an däm Oobe sind dr Diibidääbi, dr Joël, dr Zeeka und dr Schaggi gsi. D'Rolle sind ufgrund vom Keerpergwicht scho vo Aafang aa verteilt gsi und dorum isch au allne bewusst gsi, dass dr Zeeka wohrschiinlig s'gewaltige Tempo in dere Liga nit iiber die ganz Zyt ka migoh. Aber dr Reihe noch.
Aagfange het das ganze sportlich, me isch mit em Velo vo Allschwil us an Petersplatz gfahre. Nach e paar kleinere Boggsestopps (Liecht und Gäld hole) het me denn s'Ziel erreicht und grad schnäll d'Bude vom Jeffery's gstürmt. Iibrigens e Komplimänt an d'Bedienig, trotz grossem Aasturm isches flott gange und mer händ dr erschti Hunger könne stille, aber nur dr erschti. Nach däm feine Stiik (oder halt Steïk! Sicher aber nit Steak) het me welle uf e Gheimtipp vom Philipp zrugg griffe und als glains Dessert e Nutella-Berliner iine schiebe. S'isch aber am absolut falsche Egge gsuech worde und me het langsam am grosse Brueder vo zweine Mitglieder Zwiifel g'üsseret. Zum Troscht het denn halt e Riesebrootwurscht vom Jenzer miesse aaneheebe. Au do beidi Duume ufe, 6 Frangge fiir e Wurscht wo einehalb mol so gross isch wie sunscht isch e mega gfreudigi Sach! Wietermache bittscheen. Leider isch denn das iiträtte wo me het miesse erwarte: dr Zeeka het die erschti Schwächi zeigt und dr Schaggi het e grosse Biss vo sinere Wurscht derfe näh! Aber dr Zeeka isch no jung, das kunnt mit de Johre scho no.
Me het also dr Berliner scho fascht iiberwunde, do erbligge d'Auge vo de Deppe bim aabelaufe an d'Schiffländi e grosses Schild bim Basler Mässkaffi vo scheen "Berliner" druffstoht. Ändlig, me het se doch no gfunde, und nachdäm die gueti Frau hinter dr Theke äggstra fiir dr Joël no e neye Berliner gmacht händ, sind alli in Gnuss vo däm feine Gebägg ko. E wiirdige Abschluss fiir dr Petersplatz. D'Gruppe isch jetzt definitiv mit emene guete Gfühl wieterzooge.
Leider isch d'Fähri scho nimm gfahre, isch also Essig gsi mitere romantische Bootsfahrt uf em Basler Huusbach. So sind die 3 verbliebene Deppe iiber die mittleri Brugg gspurtet, dr Joël het schliesslig scho bi dr Kasärne gwartet. Är het si Velo no schnäll bim Hirschi verruumt do är no e wietere Termin an däm Oobe gha het.
Uf dr Kasärne isch s'Aagebot scho nimm so gross gsi, derfiir het d'Qualität gstumme: e Spiessli mit Currysoose vom Schwenk Grill. Die 8 Frangge sind guet aagleggt gsi, dä Spiess isch eifach fein! Aber wie gseit, das isches au scho gsi vo dr Kasärne. Dorum diräggt wieter an Mässplatz, dert het dr Diibidääbi au no e Gheimtipp gha: dr Backfisch.
Dr Backfisch am Mässplatz wirbt mit dr Rutschbahn, wo s'ässe aabegrutscht kunnt. Das ganze System dunggt ein aber bakteriell gseh eher bedängligg, mer wänd jetzt aber nit ein uf pingelig mache. Dr Fisch mitere Portion Pommes isch aagflutscht ko und usser em Zeeka händ sich alli die Sylter Spezialität schmecke loh. Em Joël isch leider d'Zyt dervo gsegglet so dass es nit fiir dr ganzi Fisch glänggt het. Per Tram und Fiess het är sich in Richtig Hirscheneck ufgmacht ans Konzärt vo de "Muff Potter". Nit verwandt mit em Harry Potter! Besser als das Konzärt isch aber sicher d'Unterhaltig bim Backfisch gsi. Insider wärde dr Spruch "HALLO BACKFISCH" oder "legger, legger, legger, legger" nie me us de Ohre griege.
Dr Joël isch also wägg gsi, do händ sich die andere 3 gseit "jetzt erscht rächt!" und als erschti Maasnahm sind dr Diibidääbi und dr Zeeka grad emol ufe "Booster" um dr Maageinhalt z'komprimiere. Wenn me die Bahn gmacht het denn isch jedi Fahrt bim Quinto im Auto e Kindergeburtsdaag, dass ka me em Autor glaube! S'wird eim jo scho nur vom zueluege schlächt! Zum Abschluss vom Mässplatz händ sich denn dr Diibidääbi und dr Schaggi no e Piadina gleischtet, eini mit Parmaschingge und eini mit Salami Milano. Isch sehr guet gsi, d'Bedienig aber besser! Grazie.
S'isch denn langsam Zyt worde zum disloziere und me het sich dasmol mit em Trämli fort beweggt. An dr Schiffländi ussgstiege, het me denn dr Ranze miesse dr Rhysprung uffe wuchte. Nit so eifach, nit so eifach. Oobe hets denn no e scheens Föteli gäh (Rieserad), dass isch aber leider au grad alles gsi. Kulinarisch toti Hose, wieter sum Seibi. Iibrigens: Fraue uf de Botschauteli sind e Erläbnis!
Uffem Seibi isch scho Fiiroobe-Stimmig gsi, s'isch jo schliessligg au viertel vor 10i gsi. Me het sich aber no e Crêpe zooge. D'Usswahl isch so gross, dass es scho e fachmännischi Unterstiitzig brucht het, damit me zum Bstelle ko isch. Aber mitemene Nutella-Crêpe liggt me nit schlächt. "Die schmecken fast immer!" het dr Verkäufer gmeint. "Fascht immer?" isch denn d'Antwort vom Diibidääbi gsi, do het dä Schwoob denn kei schlaui Antwort me druff gwüsst. Egal, au dr Crêpe isch guet gsi, wenn au e bitzeli z'viel.
Jetzt het me nur no miesse zrugg zum Petersplatz tschumple und s'Velo hole. Isch grad ideal gsi fiir d'Verdauig. Uf Grund vo verschiedene Heimwäg ändet do die Berichterstattig. Me ka als Fazit zieh, dass es einiges bruucht, bis d'Maagewänd risse. Fiir die näggschte Dääg isch sicher Faschte s'Thema.
Dr 4. Deppenmittwuch isch, wie kennts au anderscht sy, im Zeiche vo dr Schwizer Nati gstande. D'Mäss-Frässer vom 3. DOT's W. händ sich bi dr Sektion Elsass droffe um gmietlig das brisante Mätschli z'luege. Wie me uf de Föteli ka feschtstelle hets nit an Flüssigem gmanglet.
So isches also losgange, vorerscht ohni Diibidääbi, dä het nämlig no e Ligamatch gha wo leider au nit so fair verloffe isch, aber das isch e anderi Gschicht. Me het sichs vor dr Glotzi gmietlig gmacht, d'Chips sind offe gsi, s'Bier in de Händ zum öffne, in däre Zyt isch dr Match aapfiffe worde und just in däm Momänt wo me het welle dr Fläschehals an die fiechte, erwartigsfrohe Lippe aasetze het sich dr Frei Alexander ussem Baselbiet d'Pille gschnappt und uf e Penaltypunggt gleggt. E Mängge wird sich dänggt ha "verglemmi nomoll, das isch doch jetzt nit wohr, Penalty nach einere Minute?". Ebefalls sehr ungläubig sind unseri 4 Helde vor em TV gsässe und händ abgwartet was passiert. Päng hets gmacht und d'Schwiz isch einsnull vorne gsi. So schnäll ka's go, de Türgge händ also jetzt 4 Gool gfählt. D'Stimmig isch pletzlig viel loggerer gsi, d'Nervosität fascht wägg und me het kenne dr Match gniesse. S'isch denn au iiber allerhand gredet worde, nit nur iiber Fuessball, wobi dr Match immer im Mittelpunggt gstande isch. Dangg em Gool vom Frei hämmer leider iiberhaupt nüt vo dr Stimmig in Istanbul mitbeko, s'isch in dr erschte Halbzyt erstuunlig ruhig gsi.
Unterdesse isch au dr Diibidääbi derzue gstosse, ändlig (fascht) vollzählig. Me het unterenand die heisse Szene diskutiert und ghofft, dass die helvetischi Verteidigung de Türgge ka standhalte wie friener de Habsburger. Leider muess me aber sage, dasses zur Pause tatsächlich 2-1 fiir d'Bosporuskicker gstande isch. D'Stimmig in dr Parkallee isch trotzdäm guet gsi, erschtens isch d'Kombination Deppen / Bier immer e gueti Sach und zweitens wär d'Schwiz jo au mit dere Niederlaag derbi. Aber e jede het gwüsst: es stöhnd is no heissi 45 Minute bevor! Schnäll also nomoll kontrolliert ob s'Bier wirgligg bis zum Schluss länggt und ob dr Cinzano parrat stoht. Me muess jo schliessligg d'Fescht fiire wie si falle!
Gfalle isch denn tatsächligg ebbis, leider aber e Türgg im Schwizer Stroofruum. Und do jo dr Zubi "kei Penaltykiller isch" (Zitat Diibidääbi), isch 3-1 fiirs Muetterland vom Döner gstande. Ändlig dr erwarteti Närvekrieg, jetzt isch alles meegligg. Leider het sich jetzt au langsam d'Bloose bim eint oder andere gmäldet. S'het ein also wirgligg fascht verjaggt vor Spannig.
D'Fläschli händ sich immer meh mit Luft gfüllt und dr Match isch langsam gege s'Änd gange. Me het s'Ziel scho förmlich gseh, Dütschland isch nüm witt gsi. Do macht dr Streller vermeintlich dr Sagg zue in däm är ändlig si erschte Träffer in dr Nati erzielt. 86 Minute gspielt, 3-2 fiir d'Türgge und die miesste no 2 Gool schiesse. Do derf me eigentligg vonere Vorentscheidig rede. Pletzligg isch aber uf em Bildschirm 4-2 gstande und dr Schaggi het e kurze Momänt gmeint, dasses velicht doch e bitz viel Bier fiir si zarte Maage gsi isch. Das Gool het är nämlig absolut verpasst und das wo d'Türgge jetzt grad gschosse händ, das isch jo schliesslig Abseits gsi! Aber die andere 3 händ em erklärt das de Topf zellt und dasses jetzt eifach e no heisseri Schlussphase git. Närvekitzel pur, ka me saage. E Nation fieberet vor em Färnseh, unseri Deppe wisse fascht nüm wie si heisse und frässe dr Karton vom Bier, so spannend isches gsi. Do pfifft dr Schiiri ändlig ab und s'isch volländet: d'Schwiz fahrt an d'WM 2006 in Dütschland, Gratulation notierlig au vo de Deppenontour (mer sind scho immer Nati-Fans gsi!!) Uf die hässlige Szene nach em Match wott dr Autor nit iigoh. So ebbis het do kei Platz. Es wird aber scharf verurteilt!
Jetzt het me eifach kenne entspannt uf em Sofa hogge, s'isch gschafft, me isch derbi. Prompt sind die alte Heftli mit de Sammelbildli fiiregnoh worde und me het gluegt, wär im '90, '94 und im '98 alles an dr WM gspielt het. Wär kennt no d'Hurrikan-Gedängg-Frisur vom Carlos Valderama? Oder dickes Diego? Jäjä, das sind no Zyte gsi, dass sind no Männer gsi wo uf em Fäld gstande sind! Zue de Heftli aane hett me sich e Gläsli Cinzano gönnt und im Färnseh isch no die zweit Halbzyt vo dr U21 gloffe, wo gege Portugal um d'EM-Deilnahm gstoche het. Leider händ d'Schwizer do aber kei Glygg gha und sind mitemene Gsamtscore vo 2-3 usgschiede. Jänu, kasch nit immer gwinne.
Nachdäm denn au no e Schlüggli Cynar dunde gsi isch und alli Fuessballheftli duuregluegt worde sind, het me sich langsam derzue entschlosse, dä sportlich erfolgriichi Oobe z'beände. Sälber isch me zwar nit so aggtiv gsi wie an de letschte DOT's W., aber es het au e heide Spass gmacht. Näggschte Mittwuch gohts wieter, dr Brichterstatter wird au dert wieder Protokoll fiere.
Im Gegesatz zue de letschte zwei Ussdraagige isch die Uflaag vom DOT's Wednesday wieder sportlich aaghuucht gsi. Dr Joël und dr Diibidääbi händ sich fiir dä Oobe entschuldigt, somit isches Sach vom Quinto, Schaggi und em Zeeka gsi, die Sach in d'Hand z'näh.
Me het sich fiir e klassischi Wintersportart entschiede: Schlittschueh fahre. Wenn me das ganze denn no mit emene kleine Puck garniert, denn kunnt e glatte Oobe uf dr Kunschti Margrethe uuse. Und so isches denn au ko!
Dr Quinto het sich z'erscht emol Nass gmacht vor luuter Angscht, är het gmeint, är ka doch das gar nümme, schliessligg sind sini Schlittschueh syt zwei Johr im Käller unde glääge. Und denn sind doch die Kuefe gar nüm scharf. So isch das also zwei Runde lang gange bis är ändlig fertig gsi isch mit jammere. Denn pletzligg isch besser gange, es sind halt ebbe doch numme Aafangsschwierigkeite gsi.
Zum Glygg hets sehr wenig Lüüt uf dr Yysflächi gha, so händ sich unseri drei Yysvirtuose ungstört kenne em Puck widme und es sind doch e paar scheeni Kombinatione uuse koh, gewollt oder nit, das isch jetzt egal. Zwischedrii e kleine Blick ufs Spielfäld näbedra, wo d'Juniore vom EHC Training gha händ. Scho verruggt was die Sieche alles mit deere Schiibe aastelle.
Denn het me sälber wieder e paar Rundene dreit und obwohl dass fiir die Aawääsende e sauglatte Oobe gsi isch, mecht dr Autor do jetzt nit jedi Bewegig und Aktion einzeln erlüttere, dass wär denn doch z'langwiilig.
Me isch sich denn einig gsi, dass me zum Abschluss no schnäll ins Beizli sitzt und ebbis duet schnappe, allerdings isch no ei Höhepunggt uf em Programm gstande wo uf kei Fall het kenne usgloh wärde. E Prügelei zwischen em Schaggi und em Quinto, wo dr NHL alli Ehr gmacht het. Kei Angscht, s'isch keine Verletzt und die zwei rede au no mitenand. Alles friindschafligg. Aber s'het miesse sy.
Wenn me denn nach fascht 2 Stund zue de Schlittschueh uusekunnt, merggt me, was eim so alles weh macht. Speziell dr Quinto het scho während em fahre Problem mit de Fiess gha, nachem uffheere het sich das grad no verstärggt. Zum Troscht no schnäll in d'Beiz, e Epfelsäftli go näh und denn aber heim.
Statt bim Schleiss ufe Bus z'goh isches in die anderi Richtig gange, fiire gegene Dorebach. E gueti Idee, wenn numme nit grad dr 36er durch d'Dornacherstroos gfahre wär. Also no schnäll e loggers Uslaufe dr Gundeldingerstroos entlang, Billet zieh und denn zueluege, wie eim dr Bus trotzdäm vor dr Nase abfahrt. Dr Zeeka ka e Zeichnig mache wie knapp das es gsi isch, är het dr Bus zwar no an de Rüggspiegel ghebbt, aber gwunne het d'BVB. Also uf dr Näggscht warte in eisiger Kälte. Git jo Schlimmers, oder?
Alli Fans vo Happy Ends kanni beruhige: s'het au diesmol eins gäh. Die drei händs tatsächligg no gschafft uf Allschwil und heim in die gueti Stuube z'ko. Somit wär wieder e Mittwuch verbi, luschtig isches gsi und sicher mol dr Brichterstatter het kei Musggelkater.
Sie sind vermutlich noch nicht im Forum angemeldet - Klicken Sie hier um sich kostenlos anzumelden
Offline