Aazug und Grawatte hani, aber das hänggt im Kaschte. Ich gang go schaffe wie e ganz normale Bürger und Stüürzahler. S'muess nit jede gseh das ich ebbis bessers bin und mir halt e gwüsse Standart ka leischte. Ich bi immer no ein vom Volk!!
Quote:Schaggi schrieb am 07.07.2005 19:09
Aazug und Grawatte hani, aber das hänggt im Kaschte. Ich gang go schaffe wie e ganz normale Bürger und Stüürzahler. S'muess nit jede gseh das ich ebbis bessers bin und mir halt e gwüsse Standart ka leischte. Ich bi immer no ein vom Volk!!
Aha....also du willsch saage du weisch no wo du härkunnsch...odder so??
Dr Thomas Lässer nimmt im unde stehende Kommunigee Stellig zue de jüngschte Ereignis:
Sehr geehrti Dame und Herre, liebi Fründ vo dr Präss!
Es isch mer e usserordentliggi Freud ihne könne mit z'teile, das mini Arbetsloosigkeit ab em 3. Oktober, dr näggscht Mändig, e Änd het. Ich ha mich imene perseenlige Gspröch mit dr Basler Versicherig könne einige, das me mir d'Chance git, fiir mindeschtens 3 Mönet mi Könne als Sachbearbeiter im BVG-Kundedienschtzentrum am Aeschegrabe z'Basel unter Bewiis z'stelle. Nach deene 3 Monet, sprich am 1. Januar 2006, wird d'Situation neu beurteilt und e wieterfiehrig vom vorerscht temporäre Arbetsverhältnis ka diskutiert wärde. Falls es sich durch e positive Budgetbscheid fiirs näggschte Joor lost iirichte, und mi Arbetswiis rundum positiv isch, isches durchus meegligg, das e definitivi Übernahm vo mir als Arbetskraft vorgnoh wird. Das isch jedoch no Zuekunftsmusigg.
Ich wurd gärn die übliche Verdächtige iilaade, mit mir dä immäns wichtigi Schritt in minere Arbetskarriere z'fiehre. Leider bin ich das Wuchenänd vom Frytig bis am Sunntig z'Birsfälde an dr Chilbi fiir dr Veloclub im Feschtbeizli am schaffe. Falls aber Inträsse bestoht, wurd ich euch notierlig sofort e Situationsplan duure ko loh, denn gib ich gärn e Rundi feins Ziegelhof-Bier us z'Birsfälde.
Ich gniess jetzt no die Wuche "Ferie" woni han, und übergib denn leider dr Titel "Arbetsloose Depp" an Näggschte. Mi Bispiil soll aber zeige, das es immer irgendwenn e Usswäg git, au wenns no so verschisse ussgseht! Also Kopf hoch, Junge!! S'kunnt guet!! Versproche.
Ich dangg fiirs Inträsse, Frooge derfe jetzt gstellt wärde...
Es freut mi enorm für di! I ha das alles zwar scho geschter gwüsst, (Insider bruche doch kei Pressekonferenz, die hend halt überall ihri Lüüt. ...) aber das verminderet d'Freud kei bitzeli. Also, toi toi toi für die 3 Mönet und denn hoffentlich no es paar meh bi dr Baloise!
I frog mol in d'Rundi, wie gseht's us am Fritig nochem EHC Spiel uf Birsfelde z'go. (Wie isch jo no egal. Velo, Scooter, ÖV, ...) ...
E gläins Plänli wär trotzdem nid schlächt. Es isch jo nid am glyche Ort wie dert wo mr scho mol gsi sin. Y mein nid dert wo mr das Joor scho gsi sin, sondern hinte bi de Ändstation de Wald abe und denn quer über d'Stross... Sag eifach wo eures Beizli isch...
E Pläänli hani leider nit, aber es isch dert, wo mer das Joor scho mol gsi sin. S'het dert billigs Bier gäh und dr BFMW (Burgfäldermattweg) isch mit de Rollschueh gho. S'het e grooses Karussell wo's an dr Herbschtmäss au het, an däm miender rächts verbii laufe und denn gseht me is au scho. D'Tramstation heisst Schuelstroos mit em 3er, denn eifach bi de Parkplätz hindere laufe. Im Notfall hani s'Natel au no derbi!