Ich nütz grad mol mini Pause um die erschte Idrügg us Brighton und de Familie z'vermittle.
Die erscht grösseri Überraschig het's gäh, wo d'Host Mum d'Türe g'öffnet het und e asiatische Frau mir gegeüber gstande isch. Es isch jetzt halt e indisch-stämmigi Familie und kei typisch englischi Familie, aber d'Sproch vo ihne isch ganz suuber, was jo fascht d'Hauptsach isch.
S'Huus isch aständig gross, aber nit übermässig. I mim Zimmer loht sich's sicher lebe für 8 Wuche. Als erschts het mi denn d'Familie grad mol zur Busstation gfahre und isch denn die ganz Busstrecki bis zur Schuel abgfahre, dass au jo nüt falsch lauft am erschte Daag.
Nochem Dinner am Obe hemmr no fascht 2-3h zämme über Gott und di Welt gredet. Zämme heisst, näb de Familie au no die andere beide Studente, e 17jöhrige Kolumbianer und e 19jöhrige Kuwait... ahso ein us Kuwait . Vor allem politischi und historischi Themene wie de Irak Krieg, die kommende Wahle in de USA, d'Mafia in Kuwait und de Krieg im exJugoslawie hend s'Gspröch dominiert. Durch gschickti Gspröchsfüehrig sind denn immer wieder mol Themene wie Fuessball oder allg. Sport vorcho. De Vater interessiert sich sehr für Fuessball, er liist d'Resultat immer in de Zyytig. Wie sich's vermuete loht sind also TV und Internet praggtisch tabu in de Familie, schaffe und esse dominiere de Daag.
Also, ich ha euch extra no chli loh warte. D Toechtere gsehnd indisch us, sind aber nid spicy. Allerdings hani se erscht uf Foeteli gseh, do beidi scho am studiere sind. Die eint chunt aber glaub uf Oschtere verbi, aber so gnau weissi das nit.
De erscht Schueldaag isch ganz ok glofe. Am Morge sind mr zu 4. in der Klass gsi. Taiwan, Schwede (mit syrischer Herkunft) und Duetsch sind die andere Nationalitaete. Isch e ganz agnehmi Klass. Am Nomidaag simmer denn 3 Schwyyzer gsi, allerdings us 3 verschiedene Teil. De Tessiner het eifach e riise Schnurre, isch aber ganz luschtig. D Welschi isch au luschtig und unterbricht die ganz Zyyt d Lehrerin, was sie aber nit sooo stoert. Die beide goehnd aber leider Endi Wuche und bsueche nit jede Nomidaagsunterricht, d.h. ich bi jetzt denn grad ellei inere Klasse...
Betreffen Umluut: unde rechts cha meh jo d-Sprooch istelle, und uf paar PC-s isch au CH druf. Aber uf dem do z.Bsp. nit.
Na hallo, was het är denn sunscht no dert ääne? Klar, e fein Pint imene fein änglische Pub isch nit s'gliiche wie do im McGuinness oder Paddy's, denn kunnt notierlig no d'Sprooch derzue wonner will lerne, vom Fuessball willi gar nit rede, sicher au super, aber wenn de das mol alles wäg losch, ischer doch eigentligg numme wäg de Wiiber gange!
Velicht näggschtmol doch spanisch oder schwedisch lerne. Option fiir dr Friehlig 08.
Y kenn's. D'Spanierinne, d'Südamerikanerinne usw. miehn irgendwo au Änglisch lerne...
Hey, irgendwenn chum y verbi. Leider nid i de beide Aprilwuchene us FCB-technische Gründ. Y muess eifach am weekend vom 1. April cho. Hätt denn nüt vo Brighton, aber jänu, was sölls, y muess. Usserdem kenn y jo Brighton au scho vo drei Tagesreise. Y ha au scho Plän wien y das am 1. April schaffe chönnt. Y blieb dra. Bis bald!
S'Wetter isch hervorragend, praktisch de ganz Daag Sunneschiin siit em Friitig. Trotzdem hani mr irgendwie en Erchältig gholt. Aber das goht au wieder ume.
S'erscht Wuchenend isch mol super glofe. Am Samschtig bini am Morge früeh mit 3 andere Studente uf London. Noch emne ganz churze Sightseeing bini denn miteme Dütsche wiedr chli südlich noch Selhurst, um s'Spiel Crystal Palace - Leceister go luege. Wie erwartet hend mr denn no Billet becho, und zwar ohni e spezielle Wunsch grad die Beschte, wie sich's im Nochhinein usgstellt het. Vor em Match hemmer uns denn no e feine 1/2 Pounder (Burger) gönnt mit em schärfste Senf wo'n'i je gässe ha. Do chasch no so viel scharf verlange binere Döner Bude, das griegsch nit hi. Denn notürlich no 1, 2 Pints und ... in's Stadion. D'Plätz sind direkt näb de Gäschtefans uf dr Gegegrade gsi (also e leere Sektor isch notürlich no drzwüsche gsi) ... Ich überlo's jedem selber z'urteile, was für Fans sich in d'Nöchi vo dr Gäschtefans gselle. Nit grad die ganz krasse sagi mol, aber s'isch 90 Minute Stimmig gsi, wie ich's no eher selte erlebt ha in England. "You are my Palace / my only Palace / you make me happy when skies are grey / ...." isch wohl de beliebtischt Song wo denn zimli jede noch wenige Minute mitgsunge het. Palace isch denn bald mol in Füehrig gange. In dr 90. Minute denn no e Penalty für Palace, Goal! Denn isch es los gange. De Song "Who's the fat girl in the blue?" (Leicester het blaui Shirts, und d'Ahänger notürlich au) wird zue "Who's the sad girl in the blue?" ... "You did a long way for nothin' / long way for noooothin'" ... etc. D'Stimmig het nomol e Höhepunggt erreicht.
Nochem Match hemmer denn guet no 3 Stunde kha um chli London azluege. Wie au mi Dütsch Reisekolleg ha'n au ich kei Interesse kha nur berüehmti Sehenswürdigkeite z'gseh. So simmer z'Fuess eifach chli durch London gstieflet, hend Carnaby, Soho und Chinatown (3 Quartier im Zentrum vo London) agluegt. Sehr ermüedende Daag gsi, aber dr ganz Ufwand het sich glohnt!
Am Sunntig isch erhole agseit gsi. Was isch do besser geignet als sich s'Rugby Spiel England - Frankriich imne Pub azluege? Richtig, nüt! Gueti Stimmig im Pub, England gwünnt, alli sind glücklich, nur mi Chopfweh und Fieber isch noni weg.
Sie sind vermutlich noch nicht im Forum angemeldet - Klicken Sie hier um sich kostenlos anzumelden
Offline
. Vor allem politischi und historischi Themene wie de Irak Krieg, die kommende Wahle in de USA, d'Mafia in Kuwait und de Krieg im exJugoslawie hend s'Gspröch dominiert. Durch gschickti Gspröchsfüehrig sind denn immer wieder mol Themene wie Fuessball oder allg. Sport vorcho. 
